政壇：搞搞政：劉健儀培訓新人坐多一會

立法會選舉結束後，政黨高層亦大執位，由功能界別轉戰港島直選落敗嘅自由黨劉健儀（Miriam），選後已請辭黨主席職務，不過，今次自由黨喺立法會席位增加，地區支援同新秀培訓都迫在眉睫，唔怪得尋日再見Miriam，佢已經搵到新路向，就係幫手做新人培訓。

Miriam尋日出席香港工商界婦女酒會時，講到選後部署，佢透露會繼續留喺黨內多一陣，幫手培訓新人。打完選戰有冇好好休息吓﹖Miriam話選舉工程完成後，醫生叫佢要好好休息，放番五日病假，但Miriam就回應「攞唔到咁多日假」，因為佢呢幾日都要不停四出謝票。即使落敗，佢都要向支持佢嘅選民誠心道謝。

以後冇立法會嘅工作，好多姊妹都叫佢以後要多啲嚟參加工商界婦女嘅活動，Miriam就話，佢依家都仲有好多工作要做，希望嚟緊冇咁忙，可以重拾放低多年嘅興趣，好似寫書法同畫畫咁，不過大部分女人都鍾意嘅行街shopping同做facial，佢就話唔使預佢喎，因為佢一向好少呢啲活動。