政壇:鋼琴演奏會掀海關風波

海關員方尋晚喺北角總部搞咗個四手聯彈、雙鋼琴演奏會,其中一名演奏者尹俊邦係香港鋼琴家協會主席,曾奪得多個國際獎項,前年更獲邀到波蘭為蕭邦誕生二百周年舉行獨奏會,上個月啱啱先喺大會堂表演。政務官出身嘅海關關長張雲正都有親身力撐活動。

尹俊邦來頭咁猛,當然吸引唔少人,但佢同時亦係海關訓練學校一名教官嘅公子,因此演出都惹來一場小風波,有海關人員投訴,質疑尹父向學員硬銷門票,又要下屬當值期間到場做帶位員,門票收益唔知邊個袋。

張雲正聽到有關投訴後大表心痛,話今次係海關員方第一次搞音樂會,聽眾全部都係關員同佢哋嘅親友,個個都樂在其中,全部同事都放咗工先自願嚟幫手,估唔到會被人咁講!至於八十元門票嘅用途,答案就喺個琴度,原來上面有鋼琴王子李雲迪嘅簽名,運送、保險同調音樣樣都要錢,絕對無人私下落袋。

第一手消息請下載on.cc東方互動iPhone/iPad/Android/Windows Phone Apps

香港鋼琴家協會主席尹俊邦尋日義務在海關總部大樓舉行演奏會,令人聽出耳油。(林少權攝)