政壇：立會事務委會爆主席爭奪戰

新一屆立法會大執位，嚟緊嘅戰事就係各大事務委員會正副主席之戰，焦點之一係內務委員會主席，早前盛傳新民黨主席葉劉淑儀為內會主席熱門人選，但近日又有風話佢唔想每星期都同「妹妹」政務司司長林鄭月娥見面同交手，於是諗住做保安事務委員會主席，代敗選嘅劉江華制衡白鴿嘅涂謹申。跟手又有傳聞話，內會主席可能係經濟動力林健鋒同梁君彥之間「二揀一」喎。

新一屆立法會喺下月十日開鑼，七十名議員須宣誓及選舉立法會主席，同日下午就會選出內會及財務委員會主席。內會主席向來被視為立法會嘅第二把交椅，有傳重返議會嘅富貴黨田北俊都有意問鼎，但消息話，富貴黨嘅人做咗內會主席好多年，再做就畀人「世襲」嘅感覺，加上外間對田少嘅反應一般，據聞田少都有自知之明，突對外表明一定唔會做內會主席，該黨亦都唔會派人參選喎。

另一個重量級職位係負責審議撥款嘅財務委員會主席，白鴿黨劉慧卿最近率先表態想角逐連任，但一切有待該黨再作決定。至於重返議會嘅工聯會陳婉嫻則事先張揚會加入福利同人力事務委員會，首選係做福利事務委員會主席喎。另外，政府帳目委員會、人事編制委員會及交通事務委員會嘅原正副主席，亦因放棄連任或喺選舉中落敗，所以勢必掀起新一輪大執位。