政壇：王國興長毛冤家為鄰

七十個新一屆立法會議員快將進駐新立會大樓，雖然放棄連任或選舉失利嘅舊議員仲未到期搬走位於新大樓嘅辦公室，但各政黨嘅「收購合併」工程已經進行得八八九九，激進嘅人民力量同社民連一向喺議會「生人勿近」，唔少政黨避得就避。不過，今年議員人數大增，工聯會嘅議員都要進駐人力同長毛用開嘅十樓辦事處。工聯會嘅王國興同長毛梁國雄等喺拉布戰時「日以繼夜、夜以繼日」咁舌戰，今次又要日以繼夜喺議事廳見完、辦事處又見，真係困獸鬥之局！

啱啱過去嘅四年，工聯會四位議員同民建聯喺六樓做鄰居，一向太平，但新一屆兩黨加埋贏多五席，六樓嘅辦公室都坐唔晒咁多個議員，加上有個別議員為免被大黨以「人多蝦人少」為由逼走，一早已經同秘書處講明「死都唔搬」，據聞工聯會六位議員又唔想分家，剩下可以揀嘅就係响吉房最多嘅十樓囉。

十樓激進派天下

呢一層係激進派議員嘅天下，據講，構思係叫人民力量兩位現處尾房嘅議員搬去最前面嗰幾間房，等工聯會可以打通晒啲議員房方便工作。人民力量黃毓民話，起初都唔想應承，但後尾諗到前面幾間房可以睇到維港無敵大海景，所以先肯同工聯會換房。

隨着工聯會定居十樓，各立法會議員辦公室嘅合併工作已經初步完成，民建聯加金融服務界張華峰雄霸六樓全層，兩位「梁粉」、經濟動力同得番兩個人嘅專業會議就進駐七樓。公民黨、新民黨加幾位建制派獨立議員繼續留守八樓。至於選舉輸到一仆一碌嘅民主黨、公共專業聯盟及工黨眾人，一早達成共識留喺九樓。