官僚閉門造車 遍地殘花敗柳

俗語話牛嚼牡丹,意思係牛唔識欣賞牡丹花,食落肚都只係當草。其實,牛並非完全唔識欣賞花朵,例如龍船花、鴨腳水、茶花同紅絨球等等,牛一見到就唔捨得走o架。

話說康文署轄下有個西貢福民花園,耗資七千萬元興建,佔地四千平方米,有花,有草,有雕塑,仲有好多牛添吖。大家無睇錯,公園入面真係有牛,而且唔止一隻,而係一大群!居民投訴,花園六月啟用以來,一直淪為流浪牛「飯堂」,大批牛群闖入嚼食花圃入面嘅植物,唔止搞到花草凋零,大煞風景,仲對遊人構成危險。

喂,何解老牛咁知碇,識得嚟花園搵食?原來,港產官僚九唔搭八,明知西貢多流浪牛出沒,居然仲喺花園種植牛隻鍾意食嘅植物,結果咪引來牛魔王辣手摧花囉。區議員促請當局,以後做綠色規劃唔好再好似蠻牛咁盲舂舂,害人害物。

雖然話,落紅本是無情物,但係大量嬌花被無辜摧殘,康文署就算唔惜花如玉,都應該珍惜公帑吖,大拿拿幾千萬興建一個花園,轉眼變成一片殘花敗柳,咁同將納稅人金錢倒落鹹水海有乜分別呀?最令人擔心嘅係,牛發起脾氣上嚟唔係人咁品,牛群闖入花園,萬一傷及遊人,呢個責任港產官僚又孭唔孭得起先?

唉,所謂一葉知秋,港產官僚閉門造車,敷衍塞責,搞到福民花園滿目瘡痍,呢啲只係冰山一角咋,其他浪費公帑嘅醜聞簡直多不勝數。嗱,消防處曾經用七千幾萬購入十七架法國消防車,收貨之後居然發現呢樣唔掂,嗰樣唔妥,結果全部變晒廢柴;仲有吖,當局用幾億元興建柴灣青年中心,落成之後拍晒烏蠅,人流仲稀疏過社區老人中心。

叮佢個鎯鎯,呢啲咪就係前朝政府嘅施政特色嘞,求求其其,甩甩漏漏,呢度浪費,嗰度糟蹋,洗腳唔抹腳,簡直當納稅人嘅錢唔係錢!

咁講啦,官僚做嘢閉門造車,必定撞板多過食飯,貪曾時代已經結束,港產官僚唔好再做牛皮燈籠嘞,快快糾正各種施政陋習,唔止要處理福民花園嘅牛患問題,更加要收拾其他管治爛攤子,如果唔係,香港好易變成殘花敗柳嘅咋,叮!

第一手消息請下載on.cc東方互動iPhone/iPad/Android/Windows Phone Apps