政壇：政商定格：郭氏兄弟話官司無影響

捲入前政務司司長許仕仁涉貪案嘅新地郭氏兄弟郭炳江同郭炳聯，自今年七月被廉署落案檢控後，直到尋日新地舉行全年業績記者會先現身，但就唔見佢哋兩位公子，即係被委任為新地代任董事嘅郭基煇同郭顥澧出現，令人關注新地可能出現接棒問題，但二少郭炳江大派定心丸，話新地一直有班老臣子撐住，唔使佢哋兩位郭氏第三代，集團一樣運作如常。

郭炳江公布完公司業績後，一直好有心機抄低記者提問，相反細佬郭炳聯就不斷玩眼鏡，飲水同擔天望地，兩兄弟幾乎全程冇答過問題，大部分由新地老臣子擋駕。直到有記者問佢哋唔答問題，係咪因受到官司困擾等原因，郭炳江即刻反擊，話新地成立咗四十年，根基非常穩固，因為有一班好好嘅同事同團隊，發生乜嘢事都唔會倒退，仲話佢哋成日一齊開會，投地都係集體決定。

郭炳聯亦暗示冇受官司影響，依家每日返工，甚至個個星期六都有返，勤力過以前。佢仲話畀大家聽，自從被廉署拘控後，少咗人約佢哋出嚟，盡顯幽默本色，惹來哄堂大笑。