政壇:大劉何柱國前後腳開餐

華人置業集團主席劉鑾雄(大劉)同南華足球隊足主兼商人羅傑承畀澳門檢察院檢控以行賄及清洗黑錢罪,案件將於下周一開審。尋日午飯時間,大劉如常現身名人「飯堂」灣仔福臨門,隨行仲有六名保安及一個女秘書。唔知係咪因為就嚟上庭,只見大劉眉頭深鎖、愁容滿面,全程不發一言,但就飛咗個「陸軍裝」短髮,唔通佢想藉新髮型轉運,希望件案會有轉機?

無獨有偶,隔咗半個鐘之後,星島新聞集團主席何柱國又現身上址,記者上前同佢打招呼,佢只係望咗記者一眼就入咗酒家。何柱國同大劉一向老友,莫非佢哋一早約好撐枱腳,兼密斟單案點拆掂佢?直至下晝兩點幾,大劉食完飯離開飯堂,記者上前提問,佢依然當聽唔到,最後登上私人座駕離開。

第一手消息請下載on.cc東方互動iPhone/iPad/Android/Windows Phone Apps

飛咗個陸軍裝嘅大劉眉頭深鎖,冇厘神氣。

何柱國(左)同大劉前後腳到埗。