病人無水沖涼 東院管理水皮

「千祈千祈千祈，洗手洗手洗手！」前第一夫人董太金句香港人一直銘記於心。無他嘅，一來實在太經典，董太嘅笑彈偉論好難令人唔記得；二來咯喎，係人都知前食衞局局長周一嶽領軍之下，當局防疫把關潰不成軍，市民保持個人衞生的確係防範病疫嘅自保妙法。

保持個人衞生等如同病魔保持距離，呢個道理細路仔都知，偏偏站在防疫第一線嘅東區醫院唔知，理論上應該最講衞生嘅病房變成唔講衞生，本來救治病人就變咗折騰病人，叮！

乜嘢事呢？唔通東區醫院病人無得洗手？唔止無得洗手，仲無得沖涼！

件事係咁嘅，東院上月確診一宗退伍軍人症，並且喺三個醫院水樣本驗出病菌，於是急急截斷兩間出事病房嘅淡水供應，以便安裝濾水器。嗱，院方以策萬全係啱o架，不過做一半唔做一半，咁就害人不淺嘞。工程足足拖咗十九日都未全面恢復供水，搞到病人喺酷熱天氣之下無得沖涼，苦不堪言。

東院病人黃先生投訴，喺病房乾煎咗四日，卒之佢頂唔順，要去便利店買濕紙巾抹身。佢批評院方無清楚交代停水原因，剝奪病人知情權，無水沖涼更加嚴重影響個人及病房衞生。

唉，連裝幾個濾水器都搞到甩甩漏漏，東院嘅管理有幾水皮可想而知。十九日，如果院方係盡責嘅，將啲水管全部換晒都得啦！東院已經剝奪病人嘅沖涼權，仲要秘而不宣，剝奪埋病人嘅知情權，簡直就係罪加一等，叮！

所謂醫者父母心，但係由呢件事就清楚見到，東院對病人根本唔嗲唔吊，漠不關心。對正常人嚟講，天時暑熱無得沖涼一晚都覺得好難頂、好攞命啦，更何況係病人？病人住院理應得到最好嘅療養環境，家陣反而身心受到折騰，個人衞生又差過難民營，真係隨時畀佢害到病多兩錢重o架，冇陰功！

叮佢個鎯鎯！一個退伍軍人症，上年「門常開」政府總部被搞到雞犬不寧，家陣東院又變咗一個無水沖涼嘅非人地帶。一個係淪為跛腳鴨嘅前朝曾蔭權政府，一個係管理弱雞嘅東院，事實證明管理高層變咗行屍走肉，對病人造成嘅折騰往往犀利過啲惡菌。

東院唔想學煲呔曾被千夫所指，就要快啲撥亂反正，唔好折騰病人，更加唔好做傳染病幕後黑手，叮！