SUN微博:勁損海報:落選.已完.做乜好?

立會選舉曲終人散,當選嘅自然歡樂滿江華,而落選嘅都唔使咁愁,即使係金融業養活一千萬人嘅香港都可以行行出狀元,未有着落嘅都冇打緊,《Sun微博》已經好貼心咁為幾位落選人諗定後路!

陳淑莊 扮告急瀨晒嘢

陳淑莊舞台劇演員出身,代表作政治喜劇《東宮西宮》有逾半港島人睇過,之後順勢選埋議員,一炮而紅。陳淑莊演技出眾不在話下,不過選舉始終唔同做戲,好戲量唔代表有人buy,諗住拍「教授」一齊上,點知瀨晒嘢失埋業,不如重操故業做番舞台劇,既然議員都係戲子,咪當轉舞台囉,《戴錯嘢夫人》續集《瀨晒嘢夫人》主角非佢莫屬,賣出戲票肯定超過70,475張,仲搶埋人哋票房添!

黃成智 名正言順派包

黃成智早唔派遲唔派,選舉前先派包,一被踢爆又停派包,咁算點?領包嘅人唔係畀你呼之則來揮之則去!應繼續留守原地派包。依家落選冇嘢撈,黃成智譚國僑可以諗吓開間麵包舖,打正旗號賣包,好似唐唐話齋,賣菠蘿包都可促進經濟,仲唔會涉及賄選添。

李永達 高達出賣高達

李永達區選輸咗,立會選舉輸埋,終於正名「無料前議員」。李永達「高達」形象咁深入民心,不如一邊cosplay「高達」一邊「出賣」高達模型,好似李漢奸咁出賣埋自己,都係一種噱頭。高達系列歷久不衰,長做長有,分分鐘長過李永達嘅政治壽命,所以點睇都係出賣高達襟做啲。

劉健儀 反絕食導師

潮流興絕食,絕食小先鋒劉健儀以過來人身份提提大家,絕食唔似得內地「有害氣體」,係絕對會危害身體,好似佢之前喺立會絕食反拉布,走過死亡陰谷、穿越白色隧道,差啲血壓過高人體爆炸。劉健儀落選之後咁得閒,不如拉絕食大隊去大檸樂食焗豬扒飯,肯定有好多同路人。

第一手消息請下載on.cc東方互動iPhone/iPad/Android/Windows Phone Apps