政壇:政商定格:李小加續約港交所加薪7.5%

港交所行政總裁李小加「大熱」留任,獲港交所續約三年,任期去到一五年十月。佢續約之餘,仲有人工加添!睇番通告,佢續約後嘅年薪接近八百一十萬元,同佢舊年大概七百五十萬元嘅人工比較,加咗7.5%,港交所話呢個人工已經參考咗金融界類似職位嘅酬金嘞!

當然,如果計埋花紅等等就遠不止呢個數,好似李小加舊年嘅花紅就等於佢成年薪金,即係舊年總共收咗約千六萬元報酬。不過港交所今年中期業績倒退咗噃,佢真係要「奸巴爹」提升業績爭取花紅嘞!李小加○九年十月加入港交所,之後籌劃咗好多大計,好似港股加時、期指夜市,唔少都有待完成,何況收購咗倫敦金屬交易所之後,港交所發展商品業務仲有好多工作要做,佢真係好難離得開,所以聽聞續約係得到董事一致贊成,依家只係等證監會批准作實。

第一手消息請下載on.cc東方互動iPhone/iPad/Android/Windows Phone Apps

李小加獲港交所續約,續約後年薪近八百一十萬元。(資料圖片)