政壇：政商定格：CY見證青聯二十周年

香港青年聯會尋晚舉行第二十屆會慶及會董就職典禮，特別請來特首CY梁振英主禮。CY致詞時話青聯創會當日佢都有出席，見證青聯成長，笑稱自己都成長咗二十年，但好彩係佢同全國政協委員霍震寰嘅年齡差距冇變到喎！CY講完就急急腳離開，原來佢要趕去跑馬地馬場，約好一班「梁粉」撐枱腳，但佢強調大家只係風花雪月。

青聯主席葉振都全晚出入會場招呼賓客，分身不暇，其他兄弟都一樣唔得閒，好似常務副主席霍啟剛咁，前晚忙到三點都未收工。啟剛入咗會八年，識落嘅老友都話開聲幫佢籌備婚禮，但佢話有啲婚禮細節想保持神秘，都係自己搞番好啲，總之籌備婚禮零壓力。至於生仔佢就話未得閒諗住。

同場仲遇到青聯創辦人之一、立法會議員黃定光，原來當晚係佢六十三歲牛一，佢話屋企個「行政長官」出咗門，仲以為生日要孤苦伶仃，冇諗過依家賓虛咁嘅陣容，仲話最開心嘅事，係喺青聯搵到佢嘅另一半喎。