政壇：搞搞政：建仔送秋波 氹鄉紳「復合」
建仔喺立法會新界西贏到三個議席，新界東亦兩席全勝，成績咁好，連建仔中人都暗呼好彩，因為新界西最後一個勝出嘅新界社團聯會會長梁志祥，贏白鴿黨對手唔夠一千票，絕對係險過剃頭。之所以會搞到咁，同元朗其中四個鄉事委員會堅決唔肯支持建仔有關。
據講建仔都睇到問題嘅嚴重性，擔心下次唔會再咁好彩。為咗同鄉紳修補關係，建仔原來早就決定釋出善意，十月立法會新會期開始時會成立新界事務工作小組，原訂成員包括新界鄉議局主席劉皇發、為成立小組穿針引線嘅鄉議局副主席張學明、建仔主席譚耀宗同埋意外落選超級區議會嘅劉江華。
嚟緊新一屆立會，鄉事派只係得番發叔一個孤零零，建仔呢個決定，除可修補關係外，對鄉議局嚟講亦都有着數，起碼多幾個盟友唔使等發叔單打獨鬥。
設計圖片