政壇：亞視插完反國教又數臭肥佬黎

早前批評反國民教育嘅絕食學生係「破壞派」棋子，於是引來近四萬個投訴嘅亞視節目《ATV焦點》，尋日以「黎智英回來了」為題，話壹傳媒集團主席黎智英（肥佬黎）呢個「無人性」傳媒人辦，傳聞出售所有喺台灣嘅業務，雖然港媒亂台嘅日子要結束，但以後香港又會更加亂喎。節目一出街，網民又對亞視發動網上攻勢，睇嚟亞視又有排頭痕喇。

話佢係亂港禍首

該節目註明由唐文撰文，一開頭就話肥佬黎係其中一個造成香港多年來亂局嘅罪魁禍首，而最近爆發嘅國民教育爭議，肥佬黎更加係反國民教育陣營嘅頭面人物之一，節目話佢反國教嘅目的係為咗佢份宣淫謀利嘅《爽報》賺取巨額利潤，甚至可能係「玩殘」特區政府嘅政治陰謀。

節目仲話，隨着社會轉趨商業化，由以前文人辦報變為商人辦報，但好似肥佬黎呢啲「無品無良」嘅商人辦報，搞得成功就係社會禍害，佢曾經話過「只有無人性嘅人先能夠辦傳媒」，相信呢個就係佢畀自己嘅定位，之但係以佢呢個「無人性」嘅人辦嚟睇，近排頻頻傳出佢四出兜售台灣嘅所有業務，已經反映咗佢喺台灣嘅際遇，佢自己亦表明會專注香港業務，相信香港未來將會更亂喎。