政壇：泛民搶位四分五裂

原來喺立法會選舉過後，已靜雞雞展開另一場爭位戰，今次輪到爭議員辦公室。話說立法會大樓每層得十五間房，所以唔少政黨都會諗計，撇甩唔想見到嘅政黨自成一國。當中白鴿黨同人民力量成為最討厭政黨，幾乎冇一黨派想喺佢哋隔籬工作。成班議員因為辦公室咁小事，就變晒做小學雞咁，睇嚟泛民選舉後話要團結，都係得個講字。

建仔工聯會「分家」

泛民因為選舉冇協調而大敗，估唔到去到揀辦公室都係冇協調，一味顧住自己。今屆新增至四席嘅工黨，由於唔係好想同人民力量喺同一層，所以就諗到條絕橋，就係聯同白鴿黨、民協馮檢基、街工梁耀忠、衞生服務界李國麟、新民主同盟范國威同社民連「長毛」梁國雄坐埋同一層，咁就啱啱好十五人，唔使同其他人逼。不過，范國威同白鴿黨有牙齒印，呢個方案能唔能夠成事仍未知道。

至於有六席嘅公文袋，本來可以搵埋同樣都係六席嘅白鴿黨，然後再加三位獨立議員坐埋一層，但聽聞佢哋都係放唔低呢次選舉恩怨，唔想見到對方眼冤，所以公文袋寧願同富貴黨、新民黨一齊，但偏偏計漏咗新當選嘅兩位公共專業聯盟成員，可能要再重新計算過喇。

建制派方面亦係拗餐死，好似工聯會同建仔都增加議席，唔能夠坐埋同一層，所以未來四年要「真正分家」喇。預計建仔會同三散人夾埋，但三散人之一嘅保險界陳健波又話，如果可以嘅話都唔想搬辦公室，所以又未必成事。至於經濟動力預計照舊同梁美芬、石禮謙等人同層，再加埋六位工聯會議員就啱啱好。

數吓數吓，咁人民力量點算呢？上屆佢哋就喺十樓做獨家村，今屆預計有唔少新當選嘅單丁建制派會同佢哋同層，唔知佢哋做隔籬鄰舍會係火花四濺定係非常和諧呢？