北區學位難求 短視殺校埋禍

香港嘅教育規劃就係毫無規劃，結果搞到資源大兜亂，乜都爭崩頭。莘莘學子由小學開始就要衝鋒陷陣，爭奪學位，到咗中學及大學就更加唔使講，爭位爭到不亦樂乎。好嘞，就算爭到一席大學學位，又要前赴後繼爭奪宿舍床位，你話喇，今時今日做香港學生幾難吖。

好明顯，「一位難求」已經成為莘莘學子嘅漫長噩夢，呢場噩夢由小學一年級就開始o架喇。呢，因為出生率回升，加上跨境學童數目急增，小一學額變得相當渴市，尤其係新界北區，更加係爭崩頭。本來呢，多咗人返學，港府如果唔想有學生無書讀，係咪應該增加學額呀？最荒謬嘅係，明年全港小一學額居然不增反減，其中被跨境學童攻陷嘅北區，小學一年級居然較本學年減少十二班，簡直係本末倒置。

北區小一學額供不應求，對當區學童同家長嚟講，就係另一場噩夢。事關區內學額僧多粥少，必然造成搶位大戰，搶到學額嘅固然高興，搶唔到嘅學童就慘咯，小小年紀就要山長水遠跨區返學，一踏出幼稚園已經上咗人生痛苦一課。

咁都未算吖，教育界人士警告，受跨境學童急增影響，小一學額爆煲情況已由北區蔓延至鄰近地區，而且預料會愈來愈惡化，要求當局盡快復辦早年被殺嘅學校，或容許辦學團體利用空置校舍開設分校。

唉，早知今日，何必當初，正因為當局毫無規劃，亂咁殺校，先至搞到今時今日咁狼狽。跨境學童就話迫於無奈啫，本地學生無端白事被迫山長水遠跨區返學，家長唔一肚氣就假。港產教育官僚唔止害人害物，簡直誤人子弟，叮！

教育規劃無規劃，人口政策無政策，講到呢度，大家好清楚睇到一樣嘢，就係港府搞教育鼠目寸光，亂七八糟，嗰頭一意孤行殺校縮班，呢頭學額不足隨時又要死校翻生，難為煲呔曾當年仲話要發展教育產業添，講起嚟都笑大人個口喇。

係嘞，有人話為咗下一代，又搞絕食，又搞罷課。其實，學額不足就真正關乎下一代嘞，唔知邊個會為民發聲呢？邊個又會真正關心吓學生呢？

十年樹木，百年樹人，教育係長遠大計，港產官僚唔好再教而不善嘞，快快做好規劃，增加小一學額，如果唔係，盞激到班家長絕食抗議嘅咋，叮！