政壇：搞搞政：CY競選近身商界搵真銀

新政府話咁快已經上場兩個月，今年年初有份陪特首梁振英（CY）打拚嘅「近身」，近日亦傳出新動向，前主播洪綺敏Cathy早前熱傳加入新世界做公關，馮英倫就曾被傳係財政司司長政治助理嘅熱門人選，最近佢哋嘅去向終於明朗化，仲不約而同踏上商界青雲路添，前者加入商會做公關工作，後者則出任某間私人機構嘅主席助理，暫時未有計劃加入政府。

CY競選期間，呢幾名「近身」落力輔選，外間一直預計佢哋會加入新政府同CY再度合作，不過，原來佢哋都各有打算，出身港大高材生嘅馮英倫就靜雞雞重投私人市場工作，佢接受查詢時證實，最近喺朋友介紹下加入某私人機構做主席助理，近日仲要出差工作，但佢冇透露具體係幫邊個機構主席工作。

傳媒出身嘅Cathy，原來早喺個幾月前開始擔任香港中國商會副總幹事。Cathy話，自己嘅強項始終係同傳媒溝通，商會只係成立咗三年，以商會歷史嚟講仲係好年輕，未來希望多啲同各界聯繫溝通。