政壇：建仔狂鎅工聯棠哥好傷

工聯會榮譽會長鄭耀棠尋日拉埋旗下四個選區候選人，包括新界西麥美娟（Alice）、新界東葉偉明、九龍東黃國健及香港島王國興齊齊落區，聲言不滿被友黨民建聯鎅票，佢哋各自撕爛手上一張寫住「鎅」字嘅紙，希望選民支持佢哋。

棠哥埋怨建仔散布工聯會已經夠票嘅訊息，搞到工聯會各區候選人都選情嚴峻，陷於出局邊緣，佢話有人近排不斷向建制派支持者宣稱工聯會已經夠票，等選民以為佢哋穩勝，從而轉投建仔嘅候選人，鎅票情況喺近兩星期更為明顯，鎅吓鎅吓，搞到工聯會澄清都唔夠，仲要告急添。

期間棠哥仲展示一張巨型道具藥水膠布，大嗌畀人鎅得好傷。建仔主席譚耀宗被問到會唔會搵棠哥私底下拆掂佢，譚Sir就話，棠哥都冇搵佢，而且呢啲都唔係大問題，佢仲話，可能係班助選團義工太落力所致，又慨嘆：「本是同根生，相煎何太急！」新東候選名單仲有張超雄、田北俊、陳志全、劉慧卿、黃成智、蔡耀昌、范國威、湯家驊、陳克勤、葛珮帆、梁國雄、龐愛蘭、邱榮光、何民傑、梁安琪、方國珊、陳國強、龐一鳴。