政壇：中總搞飯堂大廚北上學藝
一直未有私家飯堂嘅中華廠商聯合會有意籌設會所餐廳，預計年底開張添。會長施榮懷（Irons）話，會所餐廳選址會喺中環廠商會大廈一樓，上址依家係商會企業傳訊部辦公室，面積有幾千呎，足夠擺四、五圍，稍後將安排部門調往其他樓層。據講，會所餐廳將主攻廣東及福建菜，寶號就係「福記」。
食材狂加價，飲食業都唔易做，多年前做過酒樓老闆嘅Irons就熟晒行情，加上前會長洪克協幾年前私人捐出幾十萬元畀廠商會，有資金墊底，一班元老級會員及會董亦舉腳贊成，人力、財力兼備，梗係打鐵趁熱喇。據講大廚都喺富豪飯堂界挖角，近日廠商會仲送師傅返內地學煮大江南北美食，認真揼本。