政壇：謝偉俊告急唔打客家牌

立會選舉進入最後衝刺，坊間好多告急牌，其中兩個都係早前形勢幾樂觀嘅參選人。轉戰九龍東直選嘅謝偉俊（Paul）近日大打告急牌。外間預計九東五席嘅最後一席將係佢同社民連陶君行、人民力量黃洋達三人之爭，阿Paul尋日話，今次選舉係理性同暴力之爭︰「究竟要多啲激進嘅人吵吵鬧鬧，定係中產理性代表，一切留待選民決定。」佢話，自己雖然係客家人，但冇打算喺最後關頭大打「鄉情牌」。

劉江華：命懸一線

另一個喺選舉後期告急嘅係賽前大熱門、參加超級區議會選舉嘅劉江華，多項民調都顯示佢唔係咁穩陣，近日佢四出宣傳搶票，仲話自己選情「載浮載沉，命懸一線」。不過，元朗鄉事派呢個大票倉就似乎未見佢着力去發掘票源，有元朗鄉紳坦言，唔介意喺超級議席度呼籲鄉民投票畀佢，但未見佢拜票，劉江華就話，佢會繼續接觸唔同團體，爭取支持。九龍東候選名單仲有黃國健、陳鑑林、梁家傑、胡志偉、陶君行、黃洋達、譚香文、嚴鳳至。