貪曾有家歸不得 風流過後折墮來

太一叮成日都話，天理循環，報應不爽，呢啲嘢真係唔講得笑o架。唔信？睇吓曾蔭權爵士就知啦。

唔經唔覺，曾爵士已經落台兩個幾月，呢段時間好像人間消失咁，完全唔見蹤影，佢究竟去咗邊？嗱，自從畀東方報業集團獨家踢爆連串貪腐醜聞之後，貪曾已經成為過街老鼠，可能無面目留喺香港啩，佢一卸任就同妻子急急腳外遊，行蹤神秘，十足好似老鼠咁唔見得光。自稱係「香港仔」嘅佢，唔通真係賣甩香港？原來，佢唔係唔想返香港，而係有家歸不得咋。

即係咁，消息指有關方面為咗防止貪曾喺嚟緊嘅立法會選舉搞小動作，已經落咗「三不」指令，不准佢喺立法會選舉前踏足香港、不准接觸香港官員、不准撰寫回憶錄或自傳；消息仲話，廉署正調查佢貪遍海陸空嘅案件，如果佢違反禁令返港，就會立即採取行動，話之你係前特首都無面畀！

大家知道，今年初嘅特首選舉，貪曾幫唐英年幫到出晒面，背後涉及一股龐大嘅官商勾結勢力；而本月九日嘅立法會選舉結果，直接關乎特區政府可唔可以有效施政，為免節外生枝，有關方面禁止貪曾踏足香港，以免佢搞搞震，都唔係冇理由o架。正所謂，先小人，後君子，對付呢種小人，絕對唔可以手軟。

一講到貪曾，太一叮又忍唔住要數佢啲臭史嘞。傍住富豪黐飲黐食、推慳電膽政策益親家、濫用公帑豪遊列國、打造「深圳禮賓府」、掠公家茅台酒等等，貪腐醜行簡直一籮籮。其實，以佢大小通吃嘅性格，呢啲可能只係冰山一角，未曾曝光嘅枱底交易可能仲多吖。例如，佢當年喺劉鑾鴻陪伴下走去澳門參觀捲入歐文龍巨貪案嘅樓盤「御海．南灣」，究竟有何目的，只有佢自己至知，唔通真係貪工地沙塵滾滾咩！

咁都未算吖，貪曾在任期間政策傾斜，恩澤遍及曾家及曾朋友，更加令人嘆為觀止。港英時代，授勳又好，委任太平紳士又好，多數要為社會作出傑出貢獻例如熱心公益嘅人，先至可以獲此殊榮，但喺貪曾時代，佢居然將荷蘭水蓋當利是咁派，曾朋友幾乎人人有份，永不落空。呢，連續兩次為煲呔曾做競選辦主任嘅李國寶固然獲授大紫荊，佢兩個兒子亦獲委太平紳士，你話喇，佢哋年紀輕輕，對社會毫無貢獻可言，究竟何德何能呀？

有咁耐風流，就有咁耐折墮，無論貪曾以前點樣貪遍海陸空，點樣官商勾結，依家咪又係折墮到有家歸不得，惶惶如喪家之犬？所以話，善有善報，惡有惡報，時候一到，一切都報，廉署杯咖啡仲等緊佢去飲吖，叮！