SUN微博：打橫嚟講：人絕食佢哋又絕食

「學民思潮」和「民間反對國民教育科大聯盟」佔領政府總部已一星期，十多人集體絕食，要求政府撤回課程，不得要領，官員也沒應市民之「邀請」，進入集會廣場對話，特首梁振英說：「我哋行入去，佢哋不斷喊撤回、撤回，咁係傾唔到嘅！」

香港政府立場明顯強硬，似乎一定要開展這科教育不可；大聯盟則戰鬥到底，縱使當中的絕食者陸續不適，甚或送院，卻不斷有新人加入，以最和平的手段公民抗命下去。

正當政府與人民互不退讓之際，突然有些意想不到的社會「賢達」，撲出來話要進行絕食，佢哋並非「反政府」，更不是支持學生及大聯盟，而係十分支持政府推行國民教育。這些人咁有雷氣，犧牲平日大魚大肉飲紅酒的享受，為政府爭番寸土，唔畀對家獨霸「絕食」之美譽。

第一個社會「賢達」，係全國青聯委員、菁英會榮譽主席洪為民，佢在fb上留言：「絕食三天，順便減肥，又可以避開應酬。」並叫有興趣參與嘅「必須言出必行」呀！但佢自己則話要先搵醫生檢查身體喎！再者，原來佢個仔讀國際學校，應該唔受德育及國民教育影響。

另一位「賢達」係「90後」豪華飲食集團董事總經理陳嘉華，佢組織「民間絕食行動」，支持港府，並以讀傳統學校出身之過來人身份力證自己無被洗腦喎！哦！大家睇到晒！嗱！講得出要做得到，唔該請速速上路和歸位！有請！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府