政壇：搞搞政：騎劫會名反國教三十會內訌

社會上支持同反對國民教育嘅聲音愈來愈對立，風波蔓延至由專業人士組成嘅民間智庫「三十會」，最近呢個會就爆出內訌，事關三十會七位理事包括前勞工及福利局政治助理莫宜端、專欄作家龔耀輝等人最近喺報章聯署反對國教，甚至支持罷課，但會內保守派卻覺得佢哋騎劫咗「三十會」個名，仲話該會向來係立場溫和嘅親建制組織，如果同政府唱反調，好可能會嚴重影響會員仕途，而且兩派好難共存，未來或有話事權爭奪戰。

我哋尋日收到一封匿名信，透露三十會未來幾日好可能會發生「兵變」，批評龔耀輝等亂用三十會個名喺報紙刊登反對國民教育、支持罷課嘅廣告，事前冇諮詢會員意見，唔尊重會章。

三十會召集人李律仁表現得好老定，話三十會內部間中有唔同意見係好正常，好似以前通過政改方案及最低工資時，班會員都經常有相反意見。佢仲話今次六十幾人聯署，只有七位係三十會理事，好多聯署者都係非會員，所以唔算用三十會名義做聯署喎。至於係咪影響會員加入政府，李律仁就講咗一句：「依家係做事，唔係做官。」