政壇：楊受成分享會700市民捧場

今年三月推出自傳《爭氣》嘅英皇集團主席楊受成，尋晚喺灣仔會展舉行分享會，真誠分享佢喺創業路上嘅點滴，仲講埋童年往事，吸引咗約七百名市民現身聆聽。楊受成話，佢自小家境貧窮，家人又經常要借「貴利」，所以長大後會好疏爽借錢畀朋友，享受做債主滋味，但佢唔怕蝕底，所以從來唔會向朋友追數，搞到好多街數。楊受成仲即時喺褲袋掏出一疊約有四萬至五萬元嘅金牛，佢話日日都要帶咁多錢出街，先至感覺自己富有。咁風趣，難怪在場觀眾都笑到拍爛手掌。

講番本自傳《爭氣》，書中受訪者不下一百人，但喺咁多人當中，楊受成認為有三個人係佢人生中最重要嘅，包括已故風水師陳伯，因為陳伯係佢嘅明燈，多次為佢指點迷津；另一位係已故大慈善家鄧肇堅，因為佢依家做慈善都係受到鄧肇堅嘅影響；仲有教識佢好多做人道理嘅珠海學院監督江可伯，佢同江可伯至今仍然係肝膽相照。