政壇：高永文要搵敢言副局

諍言比讒言有益，但人嘅天性卻係鍾意聽好聽嘅說話，而社會現實卻係唔少人都會近讒遠諍。食物及衞生局局長高永文深知其害，接受訪問講到聘請副局長人選時，都特別強調唔介意拍檔敢言，但最希望搵到個同自己有互補不足之處嘅人，譬如對方睇到啲佢睇唔到嘢，咁樣彼此工作嘅效果都會好啲。

新班子履新兩個月，依家都未見副局長、政治助理嘅人選公布，搞到有啲已經入咗紙申請政府高職嘅人都另尋高枝。高永文就透露，佢個副手遴選過程終於有啲「起色」，估計幾個星期之後就可以同副手見面，佢仲話，遴選副局長嘅事佢一直盡量唔插手。

問佢係咪冇個候選人揀得落手，先遲遲未決定？高醫生話，直至依家都仲有啲有志嘅人喺報名程序內，所以佢對揀選「副手」嘅進度非常樂觀。講到對副手嘅期望，佢話希望副手有承擔、唔計較得失：「唔應該成日秤過自己講完句說話有咩得失，最後就驚有損失而唔講出聲。」

食衞決策會更全面

咁會唔會揀番「同行」做副手呢？佢冇直接回應，只係話若果「副手」可以識得啲佢唔識嘅嘢，睇到啲睇唔到嘅嘢，例如認識食物安全，就好符合佢要求喇。高醫生呢個諗法即係取長補短，人冇可能萬能兼樣樣都識，如果搵個副手可以補足高醫生唔識嘅嘢，食衞局嘅決策都會更全面，難怪佢唔肯揀另一個高永文喇。