庸官惡有善報 東方不畏強權

正義受打壓，庸官獲封銜。有請「第一庸官」、前食衞局局長周一嶽上台接受嘉許！

喂，周一鑊出名渾渾噩噩，周周一鑊，落台之後唔被人清算都偷笑啦，仲要加官晉爵，有冇搞錯o架？冇搞錯，嗱，港大向九位社會「傑出人士」頒發名譽大學院士，表彰佢哋對大學同社會嘅貢獻，其中一個就係周一鑊。

大家係咪抓爆頭呢？一個劣迹斑斑嘅超級大庸官，有何榮譽可言呢？有何傑出可言呀？太一叮諗呀諗、諗呀諗……叮！終於解開謎團。講到傑出咯喎，周一鑊有樣嘢確實堪稱宇宙最強，就係打壓正義傳媒嘞！

東方報業集團為民喉舌，過去屢爆港府黑幕，揭露權貴貪腐，於是咯喎，「第一貪官」曾蔭權老羞成怒，瘋狂開動政府機器打壓東方，公報私仇。嗱嗱嗱，芸芸眾多曾氏家奴打手之中，周一鑊嘅表現就最勇猛、最傑出嘞，同佢平時失職孭鑊、垂頭喪氣個樣，簡直判若兩人o架。

周一鑊點樣打壓東方？犀利咯，旗下部門好似食環署同控煙辦，隨便一句「收到投訴」，就喺毫無理據之下派人直闖東方報業中心，次次嘰嘰喳喳「調查」一輪就話無事收工，令東方飽受滋擾，不勝其煩。衞生署仲離譜，對東方不斷選擇性檢控，赤裸裸充當打壓正義傳媒嘅政治工具。

唉，講起周一鑊針對東方呢筆帳，似足慈禧太后嘅紮腳布，又長又臭，要數嘅話數十日十夜都數唔晒。大家話嘞，奴才為拍主子馬屁，打壓正義傳媒不遺餘力，港大為咗擦鞋而頒個獎畀佢都唔算太難理解。

「東方報業民意調查」顯示，大部分受訪者直斥食環署等部門刻意針對同滋擾東方，係濫用權力，周一鑊更加要向東方道歉，同埋追究濫權責任。受訪者又批評周一鑊任內毫無建樹，獲頒院士銜並非實至名歸。

公道自在人心，周一鑊嘅鎯鎯相信都已經不叮自爆嘞。所以咯喎，太一叮今日唔再叮周一鑊嘅鎯鎯，反而想講講佢其他方面嘅表現。喺周一鑊治下，公共醫療體系屢創奇迹，打錯針、輸錯血、換錯藥、割錯器官、燒錯屍……醫療事故層出不窮，推陳出新，全世界無乜邊個醫療官員做得到。至於雙非孕婦逼爆產房、問題食品氾濫成災、醫療保險向市民開刀等獨門絕技，更加有口皆「悲」，全宇宙都難出其右！

點都好啦，雖然惡有善報，太一叮向各位保證，東方報業集團身為監察政府第四權，唔會向玩針對嘅政治勢力低頭，莫講話一個周一嶽，就算變身周十嶽，太一叮都會葉問上身：我要打十個！