政壇：政商定格：陳振邦抱4月B學語言
莎莎女婿Davis陳振邦係城中「潮爸」，囝囝陳頌言只得四、五個月大，但已跟埋爸爸上普通話、英文同音樂班。
初為人父嘅Davis好錫BB，晚上盡量減少應酬，返屋企湊仔。雖然家中傭人一大堆，講到上BB班Playgroup，Davis一定親力親為。
佢話頌言兩個月大已開始抱佢上堂，眨眼已學咗兩個月。不過，BB仔連字母都未識齊，咁早學「煲冬瓜」、英文，到底明唔明？佢就話老師上堂時會以各種圖像同聲音刺激BB感官，例如教佢哋認識人體五官，好玩又有趣，大人陪上堂都唔覺悶。
