政壇：樹根望搶三萬票入立會
喺立法會港島區選舉，依家民調仲落後工聯會「阿王」王國興兩個百分點嘅建仔鍾樹根，尋日直接踩入北角和富中心搞造勢大會，仲請埋二百幾名福建幫撐場晒冷。
心水清嘅人都知，當區區議員係工聯會嘅人，但樹根否認踩場，話當區不嬲都係建仔嘅支持者為主，仲預計佢同阿王只要各搶三萬票，就可以雙雙當選。
究竟樹根同阿王係咪雙贏？下星期日就知。同區嘅候選名單仲有單仲偕、葉劉淑儀、劉健儀、劉嘉鴻、陳家洛、何秀蘭、吳文遠、勞永樂、許清安、吳榮春同何家泰。
此外，尋晚有消息傳出，藝人謝霆鋒同汪明荃都支持李慧琼，曾志偉就推薦民建聯兩名超級候選人。