政壇：新東建制派齊告急

嚟緊嘅星期日就係立法會選舉投票日，候選名單最多嘅新界東選舉氣氛詭異，皆因工聯會葉偉明、公民力量Scarlett龐愛蘭、建仔EQ葛珮帆同陳克勤等大部分建制派候選人都告急，個個都話自己選情險峻，搞到建制派支持者唔知邊個真？到底建制派啲選票去晒邊呢？

EQ唔靠克勤仔過票

葉偉明尋日拉埋超級區議會候選人陳婉嫻出嚟拉票，話民調顯示自己支持度一直喺當選同落選間徘徊，而且唔少人都覬覦工聯會嘅選票，不時放風話佢贏梗之外，仲曾經吹到佢拎到六萬票，所以希望班工友咪聽人亂講，兩票畀晒工聯會咁話。新界東各個候選人都告急，葉偉明笑指咁樣或者會抵消咗告急嘅效用，但至少要畀支持者知道，工聯會真係危危乎喎！

另一方面，EQ尋日帶埋一班將軍澳街坊，同埋詠春拳師傅去灣仔警察總部打詠春學防狼術請願，要求政府升格將軍澳為獨立警區。佢強調自己選情好危急，但會持樂觀態度去看待選舉結果，嚟緊會穩住地區工作，因為自知好難叫克勤仔過票畀佢，費事到頭來攪亂部署喎。當問到佢同克勤仔邊個急啲時，EQ諗都冇諗就話係自己。到底信邊個好呢？

另外，Scarlett尋日都搞咗個走遍海陸空告急大會，咁講法唔通民主派真係吸晒建制派啲票，最終會大勝？真係信不信由你。新界東候選名單仲有張超雄、田北俊、陳志全、劉慧卿、黃成智、蔡耀昌、范國威、湯家驊、梁國雄、邱榮光、何民傑、梁安琪、方國珊、陳國強同龐一鳴。