坑渠油做抗生素 黑心產品又殺到

黑心食品又響警報，令內地同胞聞之色變、港人聽到作嘔嘅坑渠油產品殺到喇！內地警方教民眾用「看、聞、嘗、聽、問」分辨坑渠油，其實呢五招根本冇用，呢啲廚餘「精煉」嘅神州特產，已經升格做生產靈丹妙藥嘅原料，衝出中國，走向世界，香港都難幸免。

全國最大宗坑渠油產銷案日前開審，河南焦作某知名保健品生產商旗下子公司被踢爆用坑渠油生產抗生素原料，產品除咗賣畀內地藥廠，仲暢銷全球超過二十個國家及地區。學網民話齋，無良奸商個心簡直黑過焦作煤。

最得人驚嘅係，本港醫管局今年四月開始使用涉案生產商轄下藥廠生產嘅針劑頭孢類抗生素，仲一次過買入超過十萬支添，問你怕未。正如專家話齋，坑渠油可能帶有重金屬同致癌物質，為安全起見，當局應該透過抽檢嚴格把關，防止黑心產品流入。

坑渠油抗生素齋睇外觀根本分唔出有冇事，呢啲藥物冇療效不特止，分分鐘會加重病情，甚至危及性命，你話唔驚就假。再講吖，內地監管部門出咗名信唔過，如果淨係靠藥廠嘅檢驗報告判斷有冇坑渠油，實聽撞板。唔該醫管局快快趣趣做嘢，將有關藥廠供應嘅產品驗清驗楚，等市民有個知字。

仲有吖，公立醫院唔少藥物都係內地入口，而且所佔比例愈來愈高，如果搞到病人冇晒信心，有藥都唔敢食，延誤治療，呢隻鑊都唔知邊個孭得起。

講開又講，內地奸商唯利是圖，乜都做得出o架，黑心產品千奇百怪，只有諗唔出，冇話做唔到。從瘦肉精豬肉、橡皮雞蛋、假牛肉、染色饅頭到坑渠油抗生素，借用國家領導人嘅講法，沒有最恐怖，只有更恐怖！

係人都知，本港食品大部分來自內地，連藥物都愈來愈依賴神州產品，就算正式渠道把好關，問題產品照樣可以經水貨或走私途徑流入本港，簡直防不勝防。正所謂，唇亡齒寒，國貨有事，港人都幾難走得甩。

太一叮都係嗰句，人命大過天，食品同藥物安全防線一旦淪陷，後果不堪設想。食物及衞生局局長高永文新官上任，千祈要打醒十二分精神，咪好似前任周一嶽咁渾渾噩噩，懶懶閒，側側膊，唔孭鑊唔安樂吖，叮！