SUN微博：Sun畸事：雪藏一簽多行靠害毒果

繼十招撲樓火後，CY翌日接續出招，因應民情特事特辦，向中央反映放寬非深戶「一簽多行」，黎民百姓憂慮踩冧香城、搶貴物資，中央即時首肯「雪藏」三個禮拜。事件喜劇收場，唯獨一向獨斷獨行的肥老泥扯晒火，急召佢份《毒果報》老腫紅共商倒梁策。

肥老泥：CY撲完樓火又撲民火，搞到我火都嚟埋！

老腫紅：老細息怒！（暗忖：扯火啫，使唔使搵我出火呀？）

肥老泥：你知唔知咁雪一雪，我份《毒果》少幾多讀者？

老腫紅：根據調查，好似唔係好多個人遊內地客買嚟睇噃！（又暗忖：會唔會係你自視過高呀？）

肥老泥：你知唔知深圳執法部門擺明針對《毒果報》，偷運上去統統收繳。

老腫紅：係咪我哋為反而反，激嬲咗深圳？

肥老泥：九唔搭八！我唔係講呢瓣，本來多咗四百幾萬個非深戶排隊落嚟，就算一個巴仙買上去睇，我哋都發達。

老腫紅：點解咁肯定佢哋會買《毒果報》？

肥老泥：上面嚴打誨淫誨盜，《毒果報》咁誨淫誨盜，呢班「饑民」一定買，騎騎！

（花生友如有對號入座，請食自己）