政壇：搞搞政：林鄭掃貨忘帶環保袋

膠袋徵費落實後，好多人都培養咗出街有袋傍身嘅習慣。「好打得」嘅政務司司長林鄭月娥尋日落區，去咗西鐵錦上路站外嘅跳蚤市場視察，仲趁機買啲蔬菜、幫襯吓商戶，不過呢招親民行動卻勁多蝦碌，林鄭唔單止冇帶散紙，又冇環保袋，變咗搞笑騷。

林鄭尋日去完天水圍視察區內嘅物價後，就去咗錦上路跳蚤市場嘅有機蔬菜店、單車舖同雜貨攤，了解檔主營商環境。佢走到有機蔬菜店時，特別留意啲降暑嘅蔬菜，攞起啲秋葵、白花蛇舌草同白苦瓜嚟睇，之後仲大拋書包，話秋葵有助降血糖，而白花蛇舌草就可以消熱祛濕，跟住想用四十蚊買上述嘅嘢，點知畀錢時至發覺銀包只得一百蚊紙幣，商販冇錢找之下，惟有幫襯買多幾條矮瓜，湊夠五十蚊。到接貨時，林鄭又冇環保購物袋，個檔主只好張羅膠袋幫佢裝貨。

傾談間，檔主仲同林鄭講，話佢太遲去買菜，靚嘅已經畀人買晒囉。忙到好似林鄭咁，唔知買餸時間真係一啲唔出奇噃。