政壇：網民改歌悔信錯白鴿黨

白鴿黨一○年因為政改方案行入中聯辦「密室談判」傷透支持者嘅心，近日該黨又被揭發黨產不清、黨高層涉嫌漏報利益等連串醜聞，成個黨已腐爛變臭。立法會選舉在即，有熱心網民為提醒選民小心投票，將電影主題曲《那些年》改編成《那些年，我們一起信錯白鴿黨》，唔少網民聽到都感觸到一殼眼淚咁話。

呢首改編歌擺上網一日已經有過萬人次瀏覽，首歌道出白鴿一當選即變臉嘅殘酷真相，歌詞仲提到過去幾年喺唔少議案嘅表決都反映白鴿黨對弱勢社群係「用完就揼」，高潮位就係「明明話抗拒冇求和，然而與親中者同坐」，諷刺該黨喺政改方案表決時投贊成票賣港，所以呼籲選民「保香港靠大眾手，白鴿黨要劏，理智，別上當」。

有網民留言話，白鴿黨「一方面又話唔要西環治港，另一方面又入中聯辦秘密會談，出賣香港！」另一網民就批評「偽民主黨那班人廿多年來靠食六四老本」。大家異口同聲話，白鴿黨呃到佢哋一次，但呃唔到第二次，投票日勢要踢走白鴿黨喎。