政壇：人民力量擬投訴肥佬黎
立法會選舉選情混亂，各黨派內外互相搶票外，泛民主派更出現內訌，例如白鴿黨成員去廉政公署同選舉管理委員會舉報有公文袋候選人涉虛報「教授」銜、人民力量狙擊白鴿黨支持政改方案「賣港」等。本來呢啲問題應該由執法部門調查同交由選民去決定踢走邊啲政黨，但近日壹傳媒肥佬黎竟然出嚟搞搞震。
肥佬黎尋日喺旗下嘅《蘋果日報》發表專欄文章，狠批人民力量黃毓民收咗左派錢。文章一出街，即時引起人民力量嘅支持者強烈不滿，毓民仲怒斥肥佬黎無憑無據，作失實聲明，而且會考慮去廉政公署投訴。毓民質疑，肥佬黎捐咗千幾萬畀白鴿黨，但一直都冇出嚟交代，又質疑篇專欄文章係想保住無恥嘅白鴿黨。
人民力量話會喺選舉過後再研究下一步行動。九龍西候選名單仲有梁美芬、黃碧雲、毛孟靜、譚國僑、蔣麗芸、林依麗、黃以謙同黃逸旭。