政壇：撲樓火傻強邀功

新政府出招遏抑熾熱樓市，贏得唔少掌聲，但亦有唔少人質疑力度唔夠，財經事務及庫務局局長「傻強」陳家強尋日喺個訪問中講到十招嘅由來，佢坦言自己都有份獻計、參與，仲為外界指十招不乏炒冷飯之作反擊，傻強唔同意炒冷飯之說，仲強調好多措施獲得沿用，正正因為有用同埋「work」。佢咁踴躍拉大水喉撲樓市之火，有冇諗過呢啲火燒到咁勁，同佢哋喺上屆政府時放軟手腳有關呢﹖

唔同意係炒冷飯

樓市十招公布之後，市場嘅反應幾乎係無視，有啲賣家甚至乎加價沽售。傻強尋日接受一個電子媒介訪問時，被問到十招係咪炒冷飯，佢表示唔同意，強調政府謹慎研判依家嘅市場，關注樓市係咪穩定、健康，又重申未來三、四年一手樓供應有成六萬五千個，比起過去幾年多咗幾乎一倍。

呢組數字係滯後嘅，意思係未來三、四年啲樓宇供應量會比依家多一倍，供應多咗，熾熱樓市理應降溫。其實，呢個說話亦踢爆咗前朝政府嘅衰嘢，因為供應量要到未來幾年至增加，點解前朝政府當時要壓到樓宇供應量咁低﹖點解冇官員早啲示警、增加供應呢？

家吓樓市一片火紅火綠，日前政府高層三官齊齊撲火，尋日又輪到傻強接力，暗示家吓樓市有唔尋常之處：「我唔排除市場係情緒化嘅，好多時候市場並唔需要一啲實質理由都可以有情緒反應，或者出現一啲投機、炒賣嘅行為。」但傻強有冇反省吓，今次為樓市撲火嘅官員中，只得佢一個係前朝嘅官，佢到家吓先幫手拖水喉，係咪拖得太遲呢？