鋁警出更即出禍 一味靠嚇實太傻

盂蘭鬼節，夜半三更，心慌慌嘅司機揸車沿高速公路趕返屋企，點知突然之間，前方不遠處驚現一個疑似警察，司機心諗，唔係啩，咁夜都有人當更，唔通真係咁猛鬼？當下嚇到腳軟，油門當腳掣踩，卒之炒車收場。司機大難不死，抹抹眼鏡認真一睇，原來疑似警察只係一塊人形鋁板，簡直靠害！

唔好以為太一叮講緊笑話吖，呢個故事係真人真事改編，如有雷同，實屬悲劇。嗱，講緊嘅咪係唔知邊個蠶蟲師爺諗出嚟嘅鋁板警察囉。話說警方為咗打擊超速，減少交通意外，聲稱參考外國經驗，東施效顰咁搵咗兩位英偉警員做模特兒，整咗兩款一比一嘅鋁板公仔出嚟，喺新界北三條高速公路「站崗」，諗住阻嚇超速駕駛。點知嚇就係嚇，不過係嚇出禍，鋁警出更首日，相關道路即發生兩宗車禍，涉及多架車輛，其中一位司機報稱畀鋁警嚇一嚇出事。叮，本來係為咗防止車禍，家陣反而引發車禍，你話係咪弄巧反拙吖！

呢啲咪叫阿茂整餅，冇嗰樣整嗰樣囉。大家應該仲記得，以前警方為咗打擊店舖盜竊，亦曾經推出一系列紙板警察，開頭係威係勢咁，點知冇幾耐就消失得無影無蹤。今次由紙板改為鋁板，睇落無疑係紮實咗啲，威武咗啲，其實又係得個樣嘅咋，唔止睇得唔打得，而且唔嚇得。好簡單，就算鋁警真係可以起到阻嚇作用，亦都係暫時嘅啫，等到飛車黨知道鋁警一味靠嚇，睬佢都傻喇！

有人可能會話，呢個方法喺外國幾有效o架。冇錯，鋁警可能適用於外國，但不可不知，無論係道路系統、交通規例以至駕駛習慣，香港同外國都差天共地，喺外國行之有效嘅方法，唔代表喺香港行得通。正如南橘北枳嘅道理一樣，南方嘅橘又紅又甜，移植到北方就變成又青又澀，點解？因為環境唔同囉，好心當局唔好成日抱住「外國月亮特別圓」嘅心態喇。

講開又講，係人都唔想發生交通意外，係人都反對超速駕駛，但打擊超速駕駛唔係一咪靠嚇就得o架。如果警方真係為道路使用者安全着想，除咗應該多啲宣傳教育，更加應該加強執法，咁先至係正路。否則，整幾多個鋁警都係嘥氣，一個唔覺意，隨時益咗偷鐵黨添吖，叮！