政壇：孫秉樞唔介意再請泰傭
鐘錶界老行尊孫秉樞最近家有煩事，因為佢屋企嘅泰傭偷咗幾十萬金飾，日前佢出席一個鐘錶設計比賽頒獎禮時，好淡定咁話當破財擋災啦。件事不但冇影響佢嘅心情，連涉案泰傭被炒魷出現空缺，孫秉樞都話唔介意再請過個新泰傭，因為佢欣賞泰傭識講中文，煮嘢又好食喎！
講到呢宗家賊案件，佢透露太太係虔誠基督徒，早前心血來潮，想搵番多年前去以色列朝聖時買落嘅頸鏈，點知意外揭發唔少飾物被盜。
全球最大嘅香港鐘錶展下禮拜三喺灣仔會展登場，一眾業界人士近排都好忙，呢一日嘅活動中就見鐘錶業總會主席區宇凡及副主席高鼎國、香港錶廠商會會長黎衍橋（David）及太子珠寶鐘錶執董朱繼陶囝囝朱國良等齊齊現身，支持行業盛事。
老中青三代齊撐鐘錶界年度盛事。左起為高鼎國、孫秉樞、區宇凡同朱國良。