政壇：劉江華告急唔求工聯會
建制派喺超級區議會選舉預計坐二望三，其中工聯會陳婉嫻同建仔劉江華一直被看高一線，反而行政會議成員李慧琼就要力爭最後一席入局，殊不知最新民調結果卻出人意表，劉江華選情突然大墮後，喺七張名單僅排名第六，跌出當選之列。劉江華形容，目前選情危險要告急，再三呼籲建仔新界支持者投票支持佢；至於會否要求工聯會過票，佢相信會好難，因為始終係兩個系統運作喎。
除咗大打告急牌，劉江華喺選舉倒數階段亦大灑金錢賣選舉廣告，其中紅磡港鐵站往西鐵方向嘅大型廣告，粗略估計要近二十萬元，佢話呢個廣告係同該黨新界其他名單一齊宣傳。講開拉票，自言「又黑又瘦」嘅劉江華反而肥咗一公斤，有次着住件選舉背心去廁所時，有街坊睇住佢背影竟然話佢「有八成似劉江華」，令佢當場要即時擰轉身表露身份。
劉江華肥咗一公斤，街坊見佢背影都有所懷疑係咪佢。