政壇：20婦女街頭劇表不滿 踩場殲「黃蟲」

做議員應該謹言慎行，立法會新界東候選人、白鴿黨黃成智繼被揭發派麵包疑似賄選後，更亂噏嘢發表「剩女論」，話「（剩女）若是為增加性伴侶、或者令性觀念開放，牽涉到很多道德操守問題」，辣慶好多女性選民，尋日約有二十名婦女為表達不滿，去咗黃成智位於上水清河邨嘅辦事處抗議，仲扮埋「九天玄女」，話要剿滅「黃蟲」，要求黃成智向全港女性道歉。

冇查清辦公時間摸門釘

九名婦女上演「九天玄女殲滅『黃蟲智』」街頭劇，由九名各持太極扇或長矛嘅女士，耍起唔同門派嘅太極功夫，追打身穿黃色衫、手持「剩女」二字嘅「黃蟲」，參演者口嗌「打死佢」並展開狙擊。

有份抗議嘅Sunny話，黃成智發表嘅「剩女論」帶有侮辱成分，「雖然我哋唔係個個都係剩女，但我都有個三十幾歲、又未結婚嘅女」。佢批評剩女呢個形容詞本身已經好負面，而黃成智嘅言論更令佢覺得非常憤怒。

呢班聲稱係經網上或者喺茶樓認識嘅婦女，製作示威牌同設計口號都有板有眼，可惜佢哋似乎冇查清楚黃成智議員辦事處嘅辦公時間就摸上門，搞到摸門釘。黃成智尋晚出席一個選舉論壇時，佢同黨員都為事件消毒，話相關言論畀人斷章取義。

立法會新界東候選名單仲有張超雄、田北俊、葉偉明、陳志全、劉慧卿、蔡耀昌、范國威、湯家驊、陳克勤、葛珮帆、梁國雄、龐愛蘭、邱榮光、何民傑、梁安琪、方國珊、陳國強同龐一鳴。