執法虎頭蛇尾 老蘭繼續淫亂

中環蘭桂坊係遊客蒲點，稱唔稱得上旅遊聖地唔敢講，但如果稱之為「旅遊性地」，就絕對實至名歸！

《太陽報》同《東方日報》上個月一連兩日大篇幅揭露老蘭治安不靖，黑幫橫行，有人賣淫，有人販毒，有人開片爭地盤，更加有人利用俗稱炸彈嘅迷姦水作奸犯科，令呢個夜夜笙歌嘅買醉之地變成烏煙瘴氣嘅九反之地。旅遊熱點淪為罪惡淵藪，梗係唔可以容忍啦，報道出街之後，警方多次高調掃蕩，老蘭嘅罪惡活動即時有所收斂。

有人可能會問，警方洗完太平地，老蘭係咪從此天下太平呀？如果真係咁諗，你就太傻太天真喇。冇錯，警方係就係洗過幾次太平地，弊在虎頭蛇尾，求求其其，結果老蘭嘅黃黑毒問題唔止故態復萌，而且變本加厲，近期仲多咗大批高鐘北妹搵食添，簡直係繁榮娼盛。

嗱，本報記者現場直擊發現，呢批北方佳麗招搖過市，非常猖獗，衣着惹火「胸」襲途人唔在講，而且專門食「西餐」，周街兜搭高消費嘅外國遊客，討價還價，攬腰爆房，遊客唔知仲以為香港賣淫合法化添。至於其他陀地、泰妹、賓妹一樣公然拉客，視警方如無物。喂，香港係國際都會啫，老蘭都唔使搞到成個流鶯聯合國咁啩，你估真係中西薈萃咩，叮！

睇見蘭桂坊，太一叮就諗起唐詩《烏衣巷》，不妨稍為改改：北國神州野草花，中環巷口柳腰斜；淫竇夜店堂前燕，飛入尋常老蘭家！嗱嗱嗱，北妹殺入中環，淫業入侵老蘭，遺害可大可小㗎，一來孳生罪惡搞到治安江河日下，二來咯喎，旅遊熱點變人肉沙圈，香港旅遊業塊招牌必然蒙污。正如有區議員話齋，老蘭係本港有名旅遊景點，家陣搞到烏煙瘴氣無王管，黃黑毒問題不絕，簡直丟晒架。

話時話吖，老蘭無王管嘅何止黃黑毒，風化案更加無日無之。早前有少女喺老蘭買醉後被淫獸拉走強姦，警方話就話加強巡視，但實際上執法得個樣。本報記者就目睹有人將一個爛醉如泥嘅少女帶離老蘭，跟住發生乜嘢事就無人知咯。

所以話啫，警方唔好懶懶閒嘞，掃黃又好，掃黑又好，掃走色狼禽獸都好，執法一定要持之以恒，鐵腕滅罪，香港要嘅係一個安全健康嘅旅遊聖地，唔係烏煙瘴氣嘅旅遊性地呀！