SUN微博：打橫嚟講：鋁板假警真硬膠

香港差人有好橋，以每個成本五千銀，做咗一批鋁質假交通警，同真人比例一樣大小，擺喺公路旁，嚇窒開快車嘅司機咁話喎！

哈哈！依家啲差人真不諳民情嘞！我哋香港人，係「嚇大」o架！

放兩件「死物」喺度，代替真人執勤，如果咁都得，其他紀律部隊仲使請人？仲使辛勞訓練？嗱！海關戙個公仔，就會少咗大陸孕婦衝關？少咗水貨佬走私？又或，中聯辦門口花槽上邊，擺一排防暴隊喺度，便天下太平，無人抬棺材撒溪錢的嗎？倒不如，叫控煙辦擠件執法人員紙板喺茶餐廳，包無人違法吸煙啦！

警方話，佢哋嘅做法，曾參考過外國個喎！唉！點解一定要崇洋嘅？有無問過大陸祖國啲公安先？喺咪「外國勢力」就一定掂過咱們自家人先？我哋心繫嘅祖家強國，都唔用呢啲膠人冒充公安、武警、城管辦、聯防隊，甚或村委會，就知嚴厲執法，係要靠人治，靠真人做實事o架啦！裝假狗，玩呀？

香港呢班鋁膠警公仔，又不是一無是處嘅，好實淨o架！起碼佢哋都係用咗二十幾磅鋁製成的，而回收商收買佬話現市價三蚊一磅鋁，即一個膠警值六兜嘢o架！怪不得警方好驚畀人偷走呢批硬膠假差人，話有需要時，會搵個真人同一件假嘢「行孖咇」喎！真趣致！

香港人已經超討厭假大空的劣貨壞事了！唔該用吓腦去栽培一批年輕好警察，而非用膠人嚟醜化警隊囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：一簽多行有幾可行？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot