政壇：搞搞政：何鍾泰係泛民B隊？

立法會工程界選舉共有四人參選，其中三人工程師學會前會長盧偉國、專業會議成員何鍾泰同公文袋嘅黎廣德鬥得難分難解，各種可能打擊對手選情嘅傳聞同流言紛紛出籠。

近日有人向我哋踢爆一宗疑似選舉內幕，話何鍾泰同黎廣德喺選舉提名期前夕，即上月二十九日晚，「前後腳」到灣仔某酒店食飯。黎廣德隨後喺截止前三小時遞交報名表，令人質疑呢個飯局並非偶然。業界更流傳喺上屆立會選舉鬥到你死我活嘅何鍾泰同黎廣德，正破天荒配票，目標係令其中一人喺呢場混戰中勝出，點都唔畀盧偉國當選。

盧偉國打告急牌

咁何鍾泰係咪變咗泛民B隊？我哋問過兩名當事人，何鍾泰斷言話絕冇其事，因佢冇去過嗰間酒店，最近亦冇同黎廣德食飯，指有關消息純屬抹黑，反證佢支持度領先，相信類似抹黑行動陸續有來。黎廣德亦話冇咁嘅事，強調當日參加緊反國民教育遊行，冇可能同何鍾泰食飯，配票協調嘅講法亦係抹黑，根本唔存在。

咁混亂嘅情況下，據聞近日盧偉國已大打選舉告急牌，四出向業界拉票。但如果何鍾泰同黎廣德為求砌低盧偉國，與敵對陣營達成魔鬼協議配票，咁盧偉國就神仙都難救。工程界候選人仲有陸宏廣。