近排大市好弱雞，普通股民震騰騰，唯獨是騰訊嘅股價居然仲創緊新高，咁嘅市況仲唔畀人當搖錢樹咩！聯交所資料披露，騰訊董事劉熾平近排行使認股權入貨，條數講緊億億聲。有人估劉熾平係舊年交稅最多嘅打工皇帝，要交接近八千萬稅，全賴認股權嘅帶挈。佢今個星期二行使咗80萬股認股權，行使價只係33.05元，即係劉生用約2,600萬蚊認購咗呢批股份，但同尋日騰訊嘅收市價238蚊比較，假設劉生即刻沽咗批貨，大賺億六銀，認真和味！
騰訊董事劉熾平
