青年就業問題多 雙學制年雪上霜

暑假係搵工旺季，大家有乜好路數？巴勒斯坦有一名少女「職」出夢想，透過實驗計劃成為首位女鎮長，真係羨慕死人。相比之下，香港嘅少男少女就無咁幸運嘞，佢哋都係做官，不過係做量地官，唔少學生一畢業就失業，前路茫茫。

勞工及福利局局長張建宗發預警，指今年五至七月，十九歲至二十四歲青年失業率係百分之十點九，撞啱今年雙學制年下有十萬名畢業生，意味着有更多青少年湧入職場，七至九月嘅青少年失業率可能仲會繼續飆升。青少年係社會未來棟樑，會考狀元人數屢創新高就話好啫，家陣輟學失業人數節節上升，社會棟樑搖搖欲墜，咁搞法，香港咪隨時冧得？

最搞笑嘅係，張建宗話喎，由於歐債危機持續，美國經濟仍未全面反彈，當局仍然會關注青少年失業情況。真係聽到人Ｏ晒嘴，青少年失業率長期高企，當局仲喺度關注？喇喇聲做嘢，幫青少年搵工啦，唔該！

嗱，唔係講笑o架，當局hea住做，學生無工做，生活逼人，好攞命o架。天水圍一名雙失青年疑因生活不如意，喺屋企用床單吊頸身亡，真係令人心酸。無錯，自殺輕生原因複雜，但如果死者有份固定職業，生活無憂，命運就可能改寫，何至於做傻事吖。仲有，一名年輕失業漢長期投靠老友包食宿，日前被下逐客令後，喺碼頭企圖刎頸兼跳海輕生，好彩被談判專家勸服咋，如果唔係，本港可能又多一個失業年輕冤魂。

官不殺伯仁，伯仁因官而死。各位勞工官僚，唔好再hea嘞，快快諗計創造就業，救救班待業青少年啦！

話時話，青少年失業大軍龐大，歸根究柢，都係因為前朝曾蔭權無做好佢份工。呢位過氣特首依偎權貴搵食大家見得多，幾時見佢為青少年就業搵食籌謀過吖？開講有話，安居樂業，家陣莫講話唔少青年搵唔到工、租唔起樓，就算學歷唔錯嘅一樣愁爆，搞到大學生畢業唔係即刻去大公司面試，而係急急腳跑去申請公屋。再咁落去，你話香港仲有乜希望吖？

青年就業問題多，雙學制年雪上霜。咪話太一叮唔提醒，張建宗如果無法解決青少年失業問題，隨時下一個輪到你失業，叮！