政壇：政商定格：盂蘭勝會揭秘潮人撐場
今日係農曆七月十四，街頭又見搭棚燒衣祭拜嘅盂蘭勝會。醉心於推廣潮汕文化嘅潮州商會青委副主任胡炎松，日前喺梁顯利油麻地社區中心開講座，解構已被列入國家級非物質文化遺產嘅潮人盂蘭勝會奧秘，包括吸煙與健康委員會主席Liza劉文文在內嘅一班潮男潮女齊撐場。
問Liza有冇再建議政府加煙稅，佢笑稱：「要睇吓（食物及衞生局局長）高永文點做喇！」Liza同高醫生都係「家己冷」，以後仲多咗一層工作關係。Liza話除加煙稅仲有好多嘢要做，例如修改法例增加場地管理人嘅責任，唔可以只係勸喻咁簡單。佢又話煙盒應實行「全煙害警示包裝」，希望將十五歲以上嘅吸煙人口比率降至單位數。
劉文文（左）同胡炎松（右）老友鬼鬼，講起潮汕文化至啱傾。