政壇：搞搞政：搞井岡山遊團任啟邦自打嘴巴

泛民主派最近經常借國民教育議題攻擊建制派，仲話建制派大搞紅色旅行團，資助學生去洗腦。不過，原來泛民有口話人，冇口話自己，最近新民主同盟新界東候選人任啟邦就被指搞紅色洗腦旅行團，其中一站去「革命基地」井岡山，今次佢真係將泛民講一套做一套嘅精神發揮得淋漓盡致，完全係自打嘴巴。

有讀者踢爆任啟邦喺今年四月復活節假期搞咗個「江西井岡山、黃洋界、贛州、河源四天純玩巴士團」，就咁睇好似冇乜特別，但睇真啲就發覺，行程單張特別用粗體字去介紹井岡山嘅行程，包括去井岡山革命博物館，視察當年共產黨軍政機關同指揮所，再去埋毛澤東同賀子珍夫妻住所等，又可以大擦井岡山風味宴，仲去埋黃洋界參觀紅軍營房同紅軍造幣廠。

任啟邦回應話呢個旅行團唔可以同嗰啲小學生去紅色交流團比較，一來呢個旅行團係自由參與，唔會強迫街坊參加，而且參加得旅行嘅都係成年人，有晒自由意志，本身亦已經有既定政治立場，唔會話去完一次旅行就洗腦喎。佢仲話呢個旅行團嘅景點好「紅色」，班街坊去完旅行後似乎更反感。