政壇：黃成智「偽民主鬥士」

白鴿黨經常批評西環干預本港事務，又成日口口聲聲投訴自己啲黨員冇回鄉證返大陸。不過，佢哋參選立法會新界東嘅黨員黃成智就畀人話佢原來一早已經投共。有不值白鴿黨成日講一套、做一套嘅市民向我哋報料，話本身係基督徒嘅黃成智早喺○八年曾遠赴北京，同內地愛國教會北京基督教三自會成員會面，仲拜會埋國務院宗教局。嗰位市民睇唔過眼，批評黃成智投共，係「偽基督徒」同「偽民主鬥士」，仲話佢「根本就係欺騙世人」。

我哋喺黃成智嘅官方網站度，亦搵到兩張黃成智拜會宗教局以及同北京基督教三自會成員會面嘅相。根據網站按日期羅列活動照片嘅方式，顯示佢係喺○八年四月上京。

行程揀正立會選舉前

據了解，北京基督教三自會又叫做「北京市基督教三自愛國運動委員會」，被視為愛國教會，係受國務院宗教事務局監管嘅。白鴿黨成日都投訴泛民成員冇回鄉證返唔到大陸，又大大聲反對西環治港，但佢哋自己友就唔止可以上京，仲獲國家機關接見添，真係非比尋常。咁啱黃成智上京時間又正正係當年立法會選舉前，如果掉轉係佢哋嘅對手上京，泛民分分鐘又會藉此大做文章。我哋聯絡過黃成智，但佢冇覆我哋。

新界東候選名單仲有張超雄、田北俊、葉偉明、陳志全、蔡耀昌、范國威、劉慧卿、何民傑、湯家驊、陳克勤、葛珮帆、梁安琪、龐愛蘭、方國珊、陳國強、龐一鳴、梁國雄同邱榮光。