與其抗拒個人遊 不如諗計增設施

水能載舟，亦能覆舟，呢個道理係人都知；但如果話個人遊利港，亦能害港，咁又點樣解釋呢？

嗱，內地進一步開放個人遊，非深圳戶籍人士「一簽多行」計劃下月一日實施，意味着再增多四百萬人可以隨時遊港。本來呢，愈來愈多旅客來港消費，點講都係利多於弊，可惜喺中港矛盾日益激化嘅今日，幾好嘅措施都會變成政治議題。君不見，有人反對內地繼續開放個人遊，有人擔心太多旅客會逼爆香港，有人甚至要求港府取回個人遊審批權添，曾幾何時被當成本港經濟救命稻草嘅個人遊，今時今日居然被視為洪水猛獸，你話奇唔奇吖。

面對社會上嘅各種疑慮，特首梁振英回應話，旅遊業作為香港重要支柱行業，當局會留意及控制旅客人數，亦會檢視相關配套設施是否足夠。

冇錯嘞，既然旅遊業對本港咁重要，當局實在有必要盡快諗諗計喇。講句公道說話，內地不斷開放個人遊，出發點都係為香港好啫。試諗吓，如果冇咗個人遊，旅遊業呢條支柱仲撐唔撐得住呢？零售消費市道仲有冇咁興旺呢？整體經濟仲可唔可以增長呢？港人一邊攤大手板問中央攞着數，一邊嫌三嫌四，簡直就係「有事鍾無艷，無事夏迎春」。老實講吖，如果內地有朝一日閂水喉，叫停個人遊，香港都唔知點算好。

計太一叮話齋，與其嫌三嫌四，倒不如檢討自己先啦。內地旅客逼爆香港，旅遊業問題多多，歸根究柢係本港配套設施不足，例如酒店房間供不應求，旅遊景點缺乏新鮮感，加上黑店劏客事件不絕如縷，令旅遊業面臨重重隱憂。反觀澳門，面積細過香港，旅客人數多過香港，但人哋就冇咁多問題，更加唔會對個人遊嫌三嫌四，點解？人哋嘅規劃做得好，旅遊設施夠完善囉。逆水行舟，不進則退，如果香港仲唔快啲諗辦法改善配套，增加設施，而係成日掛住政治爭拗，日嘈夜嘈，遲早自毀長城o架咋。

不過講番轉頭，香港始終係彈丸之地，承受力有限，港人擔心內地旅客愈來愈多會逼爆香港，都唔係完全冇道理。正如有人話齋，尖沙咀廣東道已經被內地客「攻陷」，如果條條街都係咁，怕且香港人遲早冇碇企。所以呢，港府其實應該同內地好好協調，諗吓點樣有秩序開放個人遊，適當控制旅客人數，咁對大家都有好處，係咪！