SUN微博：打橫嚟講：禍港建議，遺臭萬年

近排有閒人嫌前朝留低蘇州屎唔夠多，無端端拋出一個新界東北邊境模糊化方案，容許喺深圳打工的「民工」可以「一簽多行」自由出入香港。

此建議一出，就搞到要我哋政府高層政務司司長林鄭出來澄清此乃非政府計劃，繼而梁振英特首亦隨之發聲明指未有此考慮，以劃清界線，但不出兩日，又有人喺電台力主發展此方案，有利香港經濟喎！真唔知香港由誰做阿頭？點解一個個咁無大無細？咁唔使畀面梁政府？

何況，畀多四百幾萬個深圳工人來港，真的可以幫到香港發達？

記者訪問那些內地勤勞的同胞，佢哋話每日可以多次往返，真的有幫襯香港o架！佢哋一定買多啲奶粉尿片日用品，因做「走水客」方便咗，唔做就笨咁話！呢班大帝的經濟效益有助香港？

仲有，今時今日的「個人遊」內地客流量，已令港府頭痕未愈，你啲蠶蟲師爺再嚟出橋添煩添亂？怕梁特首的熱廚房未爆炸呀？

讓深圳民工自由出入，仲未算仆街，還建議利用邊境土地設立「特別發展區」，即「香港特區內的特區」？搞獨立乎？

最荒謬的，係內地人就可以自由出入該「特區範圍」，反過來，香港人卻要得到批准，才可以進去「香港特區內的特區」，所以被人罵如此做法，在香港歷史上，一定會記上一筆的！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：一簽多行有幾可行？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot