SUN微博：Sun畸事：黑客偷走了后冠？

選美前多會頻爆「峰波」（Sorry，係風波），但係已經年屆四旬的香城小姐（又要Sorry，係香城小姐競選），賽前平到不得之了，形勢告急，監製壓軸來一場假普選，冇波變成洶湧餘波，已登記的「選民」擬號召上街向I記舉報有黑幕，CCTVB高層急召監製問話。

高層：你知唔知我哋破咗投訴紀錄，畀人勁鬧小圈子欽點當選。

監製：我哋幾十年都係欽點，佢哋後知後覺啫！

高層：係就係，之但係我哋講明開創一人一票，點解畫？

監製：有計，賴黑客搞喎。

高層：搵鬼信咩！啲討論區滾動民調話冠軍得票好低。

監製：不如話係功能界別選舉結果。

高層：咁係乜界？

監製：集郵界，報紙話佢出名集郵好叻，喺無對手下自動當選。

高層：有道理，但係啲選民好關心送唔出架車。

監製：不如學天圓地方商場換平價手機咁，凡登記咗人人有份咪得囉！

（花生友如有對號入座，請食自己）