政壇：搞搞政：黃成智倡拗直同志

白鴿黨立法會新界東候選人黃成智近日醜聞纏身，本報早前獨家踢爆佢涉嫌以名下機構同友好組織名義，喺選舉期間向區內老人家免費派包，令人質疑佢賄賂選民；之後佢又發表「剩女唔結婚係為咗搵更多性伴侶」嘅言論，傷透女性心，大鬧佢唔尊重女性，有人要求佢道歉，仲有人揚言要用選票踢佢出立法會。

點知一波未平，一波又起，佢喺競選宣傳單張上提及同性戀人士，但唔係支持同性戀，而係硬銷自己曾「關注當同性戀人士希望脫離同性戀生活方式或改變性傾向時，政府有沒有提供適切的支援」，被指變相鼓吹「拗直」治療。

呢則關注同性戀支援嘅「功績」，隨即喺社交網站瘋傳，其中組織「同志公民」相當不滿，批評佢推動「拗直」治療同抹黑同志服務；有網民話件事證明黃成智視野狹隘，心存偏見同冇公義之心，正一「道德塔利班」；有人仲大鬧佢話：「真係冇嘢好講，不如九月九號趕佢落台！」有網民又話其實全球好多專業團體已反對改變性傾向治療，黃成智咁講擺明就缺乏政治智慧。

我哋就此事問過黃成智，佢死撐話只係有專門協助同性戀者脫離同性戀生活嘅組織搵佢幫忙，想佢問吓政府能否提供支援，並非佢鼓吹「拗直」治療，純粹誤會。